ជំនួបជាប្រវត្តិសាស្រ្តរវាងមេដឹកនាំកូរ៉េខាងជើង និងចិន

ប៉េកាំង៖ ប្រធានាធិបតីកូរ៉េខាងជើង គីម ជុងអ៊ុន (Kim Jong-un) នៅសប្តាហ៍នេះ បានមកជួបប្រធានាធិបតីចិន ស៊ី ជីនពីង (Xi Jinping) នៅទីក្រុងប៉េកាំង ដើម្បីសុំយោបល់ ណែនាំមុនពេលទៅជួបចរចាជាមួយមេដឹកនាំកូរ៉េខាងត្បូង និង ប្រធានាធិបតីអាមេរិក ដូណាល់ត្រាំ។ នេះបើយោងតាមសារព័ត៌មានចិនស៊ិនហួរ (Xinhua)។

តាមសារព័ត៌មានអន្តរជាតិត្រែបឡាយ (TribLive) ក្នុងជំនួបនោះ មេដឹកនាំផ្តាច់ការកូរ៉េខាងជើង បានជជែកពិភាក្សាគ្នាជាមួយសមភាគីចាក់ទឹកមិនលេចរបស់ខ្លួន គឺលោក ស៊ី ជីនពីង លើបញ្ហាសំខាន់ចំនួនពីរ។ ទី១៖ ការចរចាជាមួយប្រធានាធិបតី​កូរ៉េខាងត្បូង លោកមូន ចៃអ៊ីន (Moon Jae-in) នៅចុងខែមេសា និងជំនួបនៅខែឧសភា ជាមួយប្រធានាធិបតីអាមេរិក លោកដូណាល់ ត្រាំ (Donald Trump) រួមបញ្ចូលការសន្យាបញ្ឈប់កម្មវិធីនុយក្លេអ៊ែរ។

ទាក់ទិននឹងជំនូបទាំង២ខាងលើនេះ មេដឹកនាំប្រទេសកូរ៉េខាងជើងពិតជាមានការប្រុងប្រយ័ត្នខ្ពស់ ព្រោះថាការចរចាលើកនេះ អាចគម្រាមដល់ខ្លូនលោក និងរបបកុម្មុយនីសនេះតែម្ដង។ មិនត្រឹមតែប្រុងប្រយ័ត្នប៉ុណ្ណោះ ទេ មេដឹកនាំកុម្មុយនីសកូរ៉េខាងជើងរូបនេះ ក៏មានក្តីព្រួយបារម្ភ​ទៅលើ​ជំនួប​ប្រវត្តិសាស្ត្រ​ជាមួយប្រធានាធិបតីអាមេរិក ដូណាល់ ត្រាំ (Donald Trump) តែម្ដង ព្រោះថាថ្មីៗនេះ ដូណាល់ ត្រាំ (Donald Trump) ទើបតែង​តែងតាំងទីប្រឹក្សាសន្ដិសុខជាតិអាមេរិកថ្មី គឺលោក ចន បុលតុន (John Bolton) ។ លោក  ចន បុលតុន (John Bolton)  នៅក្នុងជម្លោះអន្តរជាតិ ត្រូវបានគេមើលឃើញថា ចូលចិត្តប្រើយោធា ជាជាងការចរចាបែបការទូត។

ក្រោមហេតុផលនេះហើយ ដែលធ្វើឲ្យមេដឹកនាំកូរ៉េខាងជើង លោកគីម ជុងអ៊ុន (Kim Jong-un) មានបំណងអូសទាញបងធំស៊ីមកធ្វើជាខ្នងបង្អែក ក៏ដូចជាសុំឲ្យជួយសម្រួលដល់ការចរចានាពេលខាងមុខនេះផងដែរ។

ចំណែកឯគោលជំហរចិននៅក្នុងជំនួបធំៗទាំង២របស់កូរ៉េខាងជើងនេះវិញ ចិនមានបំណងចង់​ឲ្យការចរចាបញ្ឈប់​កម្មវិធីនុយក្លេអ៊ែរ​របស់​កូរ៉េខាងជើង​បានជោគជ័យ ព្រោះចិនមិនចង់ឲ្យជប៉ុនតែងយកលេសនេះមកបង្កើនកម្លាំងយោធារបស់ខ្លួន​ដែលសកម្មភាពរបស់ជប៉ុននេះ​អាចគំរាម​ដល់អំណាចចិនក្នុងតំបន់។

យ៉ាងណាមិញ ចិនក៏តែងតែមិនចង់ឲ្យប្រទេសកូរ៉េទាំងពីរបានរូបរួមគ្នាវិញឡើយ ព្រោះចិនភ័យខ្លាចថា បើប្រទេសទាំងពីររូបរួមគ្នា នោះគោលដៅបន្ទាប់​របស់អាមេរិកអាចនឹងសំដៅមកលើចិន និងគម្រាមកំហែងដល់របបកម្មុយនីសតែម្ដង។

គួរបញ្ជាក់ផងដែរ នេះជាទស្សនកិច្ចលើកដំបូងរបស់មេដឹកនាំកូរ៉េខាងជើង គីម ជុងអ៊ុន (Kim Jong-un) និងប្រធានាធិបតី ស៊ី ជីនពីង (Xi Jinផing) បើគិតចាប់តាំងពីមេដឹកនាំកូរ៉េរូបនេះចូលស្នងដំណែងពីឪពុកខ្លួន គីម ជុងអ៊ីល (Kim Jong-il) ៕

អត្ថបទដោយ ម៉េង សុខហ៊ួយ