ទឹកបាក់ទំនប់ពីឡាវ ហូរលិចតំបន់មួយចំនួននៅខេត្តស្ទឹងត្រែង

តំបន់មួយចំនួននៅតាមព្រំដែនកម្ពុជា-ឡាវ ចាប់ផ្តើមលិចលង់ ដោយសារតែទឹកជំនន់ដែលហូរកាត់ចេញពីការបាក់ទំនប់ Se-Pian Se Nam Noi ក្នុងខេត្ត Attapeu ប្រទេសឡាវ នៅព្រឹកថ្ងៃទី ២៥ ខែកក្កដា ឆ្នាំ២០១៨ នេះ។

បើតាមក្រសួងធនធានទឹក និងឧតុនិយមកម្ពុជា តំបន់មួយចំនួននៅក្នុងឃុំថ្មកែវ ឃុំសន្តិភាព និងឃុំសេកុងស្រុកសៀមប៉ាង ខេត្តស្ទឹងត្រឹង ត្រូវជន់លិច ខណៈទឹកទន្លេសេងកុង បានហក់ឡើងដល់កម្ពស់ ១១, ៣០ ម៉ែត្រ ខណៈកម្រិតប្រកាសឱ្យប្រុងប្រយ័ត្នមានកម្ពស់ ១១, ៥០ ម៉ែត្រ។ រហូតមកទល់ពេលនេះ អាជ្ញាធរខេត្ត បាននិងកំពុងជម្លៀសប្រជាពលរដ្ឋទៅកាន់ទីទួលសុវត្ថិភាព។

ហេតុការណ៍ទំនប់វារីអគ្គិសនីនេះ បានកើតឡើងកាលពីថ្ងៃទី ២៤ ខែកក្កដា ឆ្នាំ២០១៨នេះ។ ការបាក់ទំនប់វារីអគ្គិសនី ត្រូវបានក្រសួងធនធានទឹក និងឧតុនិយមកម្ពុជា អះអាងថា នឹងមានផលប៉ះពាល់ដល់ប្រទេសកម្ពុជា ត្រង់ចំណុចខេត្តស្ទឹងត្រែង ដោយទឹកអាចនឹងជន់លិចតំបន់ទំនាបនៃខេត្តនេះ នៅពេលឆាប់ៗខាងមុខ។

សូមរំឮកជូនថា ទំនប់វារីអគ្គិសនី Se-Pian Se Nam Noi ស្ថិតនៅក្នុងខេត្ត Attapeu ភាគខាងត្បូងប្រទេសឡាវ មានចំងាយប្រមាណជា ៧០ គីឡូម៉ែត្រពីព្រំដែនកម្ពុជា-ឡាវ។ ទំនប់ Se-Pian Se Nam Noi របស់ប្រទេសឡាវ មានសមត្ថភាពស្តុកទឹកប្រមាណជាង ៥ ពាន់លានម៉ែត្រគូប និងអាចផលិតផលថាមពលអគ្គិសនីបាន ៤១០ មេហ្គាវ៉ាត់ ទើបតែសាងសង់ចប់នៅឆ្នាំ២០១៨ នេះ។

បើតាមបណ្តាញសារព័ត៌មានប្រទេសឡាវ ការបាក់ទំនប់វារីអគ្គិសនីនេះ បានបាក់បណ្តាលឱ្យមនុស្សរាប់រយនាក់បាត់ខ្លួន ហើយអាចមានស្លាប់ច្រើននាក់៕