ជីវិត​ និង​ការ​ហាត់​ការ​នៅ​ស្ថាប័ន​កាសែត​បាងកក​ប៉ុស្តិ៍​ (Bangkok Post) នៃ​ប្រទេស​ថៃ​

ពួក​យើង​ត្រូវ​បាន​បញ្ជូន​ឱ្យ​មក​ចុះ​កម្មសិក្សា​នៅ​ស្ថាប័ន​សារព័ត៌មាន​បាងកក​ប៉ុស្តិ៍ (Bangkok Post)​ ក្នុង​ប្រទេស​ថៃ​។ ស្ថាប័ន​មួយ​នេះ​ គឺ​ជា​ស្ថាប័ន​កាសែត​​ចំណាស់​ និង​ធំ​ជាង​គេ​នៅ​ទី​ក្រុង​បាងកក​។ ក្នុង​អាយុ​កាល​៧២​ឆ្នាំ​ បាងកក​ប៉ុស្តិ៍​ (Bangkok Post) មាន​ភាព​ចម្រុះ​នៃ​អត្ថបទ​ព័ត៌មាន​ ដូចជា​ព័ត៌មាន​ជាតិ​ទូទៅ​ (National) ព័ត៌មាន​ទាក់ទង​នឹង​ជីវិត​ប្រចាំ​ថ្ងៃ​ (Life) ព័ត៌មាន​កីឡា​ (Sport)ព័ត៌មាន​ក្នុង​តំបន់​អាស៊ី​ (Asia Focus) ព័ត៌មាន​សេដ្ឋកិច្ច​ (Business)ជា​ដើម​ ដែល​ចេញ​ផ្សាយ​ពី​ពីរ​ភាសា​ គឺ​ថៃ​ និង​អង់គ្លេស​។ ក្រៅ​ពី​បោះ​ពុម្ព​ចេញ​ជា​ក្រដាស​កាសែត​ជា​ពីរ​ភាសា​ បច្ចុប្បន្ន​ស្ថាប័ន​ចំណាស់​មួយ​នេះ​ ក៏​បាន​វិវឌ្ឍ​ន៍ខ្លួន​តាម​សម័យកាល​អ៊ីនធឺណិត​ ដោយ​មាន​ចែក​ចាយ​អត្ថបទ​ និង​វីដេអូ​ លើ​បណ្ដាញ​សង្គម​ផង​ដែរ​​។

ភាព​សំបូរ​បែប​នៃ​ព័ត៌មាន​ ធ្វើ​ឱ្យពួក​យើង​ពិបាក​សម្រេច​ចិត្ត​ថា​ គួរ​តែ​​រៀន​សូត្រ​នៅ​ក្នុង​ផ្នែក​មួយ​ណា​ ព្រោះ​គ្រប់​ផ្នែក​គឺ​​សុទ្ធ​សឹង​តែ​មាន​ចំណុច​ល្អ​ៗ​ឱ្យ​ពួក​យើង​បំប៉ន​បន្ថែម​។ ទី​បំផុត​ ពួក​យើង​ ក៏​​ជ្រើស​រើស​ចូល​ផ្នែក​ព័ត៌មាន​ក្នុង​តំបន់​អាស៊ី​ (Asia Focus) ព្រោះ​ពួក​យើង​ចង់​ស្វែង​យល់​ ក៏​ដូចជា​លើក​ឡើង​ពី​បញ្ហា​ក្នុង​តំបន់​មួយ​នេះ​ ពិសេស​គឺ​ទាក់​ទង​នឹង​ប្រទេស​កម្ពុជា​​តែ​ម្ដង​ ដើម្បី​ឱ្យ​អ្នក​អាន​បាន​ដឹង​ និង​គិត​គូរ​ពិចារណា​។

ពិត​ជា​មិន​ខក​បំណង​មែន​ ការ​ចុះ​កម្មសិក្សា​ក្នុង​ផ្នែក​តំបន់​អាស៊ី​ (Asia Focus) ពួក​យើង​ទទួល​ការ​យក​ចិត្ត​ទុក​ដាក់​យ៉ាង​ខ្លាំង​ពី​រៀម​ច្បង​អ្នក​កាសែត​។ ពួក​គាត់​តែង​តែ​ម​ជួយ​ណែនាំ​ និង​ផ្ដល់​ជា​គំនិត​ល្អ​ៗ​ លើ​ប្រធាន​បទ​ដែល​ពួក​យើង​លើក​ឡើង​ថា​ចង់​ធ្វើ​។ ពួក​យើង​បាន​រៀន​សូត្រ​ច្រើន​ខ្លាំង​ពី​ការ​ចុះ​ធ្វើ​ការ​ផ្ទាល់​ក្នុង​ផ្នែក​នេះ​។

ក្រៅ​ពី​នេះ​ ​ស្ថាប័ន​បាងកក​ប៉ុស្តិ៍​ (Bangkok Post) បាន​យក​ចិត្ត​ទុក​ដាក់​យ៉ាង​ម៉ត់ចត់​លើ​សុវត្ថិភាព​របស់​បុគ្គលិក​ ក៏​ដូច​ជា​អ្នក​ចុះ​កម្មសិក្សា​ផង​ដែរ​។ ជាក់ស្ដែង​ ដោយ​ពុំ​មាន​មធ្យោបាយ​ធ្វើ​ដំណើរ​សាធារណៈ​ណា​មួយ​អាច​ទៅ​ដល់​ស្ថាប័ន​បាងកក​ប៉ុស្តិ៍​​ (Bangkok Post) ព្រោះ​​ទី​តាំង​ស្ថាប័ន​នេះ​ ស្ថិត​នៅ​ជិត​តំបន់​អនាធិបតេយ្យ​ធំ​ជាងគេ​ក្នុង​ទី​ក្រុង​បាងកក​ ដូច​នេះ​ បាងកក​ប៉ុស្តិ៍​គ្រុប​ មាន​ផ្ដល់​ជា​សេវា​ដឹក​ជញ្ជូន​បុគ្គលិក​ពី​ក្រុមហ៊ុន​ ទៅ​កាន់​ផ្សារ​ក្លងតឺយ​ (Klong Toey) ដែល​មាន​ចម្ងាយ​ប្រមាណ ២​គីឡូ​ម៉ែត្រ និង​ជា​បណ្ដុំ​ចំណត​រថយន្ត​ក្រុង​សាធារណៈ​ផង​ដែរ​។

ជីវិត​ក្នុង​ទី​ក្រុង​បាងកក​

កម្ពុជា​ និង​ថៃ​ មាន​វប្បធម៌​ ការ​រស់​នៅ​​ស្រដៀង​គ្នា​ ដូច្នេះពួក​យើង​មាន​ភាព​ងាយ​ស្រួល​ក្នុង​ការ​រស់​នៅ​ ។ រសជាតិ​ និង​តម្លៃ​ម្ហូប​អាហារ​ ការ​ស្លៀក​ពាក់​ តុបតែង​ខ្លួន​ គឺ​សឹង​តែ​ដូច​គ្នា​នឹង​ប្រទេស​កម្ពុជា​។ ដូចនេះ ពុំ​មាន​នរណា​មើល​មក​ពួក​យើង​ជា​ជន​បរទេស​ឡើយ​ បើ​ពួក​យើង​មិន​និយាយ​ស្ដី​។

យ៉ាងណាមិញ​ ពួក​យើង​ក៏​ជួប​បញ្ហា​ប្រឈម​ចំនួន​ដែរ​ ទាក់​ទង​ការ​ធ្វើ​ដំណើរ​។ ដូច​ដែល​បាន​ដឹង​ស្រាប់​ហើយ​ ចរាចរណ៍​នៅ​ទី​ក្រុង​បាងកក​ មាន​ភាព​មមាញឹក​ និង​កក​ស្ទះ​ខ្លាំង​។ ម្យ៉ាង​វិញ​ទៀត​ ផ្លូវ​ច្រើន​ជាន់​ និង​ខ្វាត់​ខ្វែង​។ ដូចនេះ​ ភ្លាម​ៗ​​ ពួក​យើង​ពិបាក​នឹង​ចំណាំ​ផ្លូវ​ ពោល​គឺ​ពួក​យើង​កាន់​ Google Map ជាប់​ជាមួយ​ជានិច្ច​។

សូម​អរគុណ​ដល់​ដេប៉ាតឺម៉ង់​ប្រព័ន្ធ​ផ្សព្វ​ផ្សាយ​និង​សារ​គមនាគមន៍​​ (DMC) និង Konrad-adenauer-stiftung Cambodia ដែល​បាន​ផ្ដល់​ឱកាស​ដ៏​ល្អ​មួយ​​ សម្រាប់​ឱ្យ​យើង​ដក​ពិសោធ​ភាព​ខ្លាំង​ និង​ភាព​ខ្សោយ​របស់​​ខ្លួន​ឯង​ និង​ក្រេប​ជញ្ជក់​ចំណេះដឹង​ថ្មី​ៗ​ជា​ច្រើន​ទាក់​ទង​នឹង​ការ​ធ្វើ​ការងារ​ប្រកប​ដោយ​វិជ្ជា​ជីវៈ​​ពី​រៀម​ច្បង​អ្នក​កាសែត​អាជីព​នៅ​ស្ថាប័ន​កាសែត​បាងកក​ប៉ុស្តិ៍​ (Bangkok Post)​។ ការ​មក​ស្នាក់​នៅ​ទី​ក្រុង​បាងកក​​ បាន​បង្រៀន​ពួក​យើង​ច្រើន​ពី​របៀប​រស់​នៅ​ឯករាជ្យ​។ ពួក​យើង​រៀន​ធ្វើ​ដំណើរ​ដោយ​មធ្យោបាយ​សាធារណៈ​ដោយ​ខ្លួនឯង ដោះ​ស្រាយ​បញ្ហា​ដោយ​ខ្លួនឯង មើល​ថែ​ខ្លួនឯង​។ និយាយ​រួម​  ការ​មក​ចុះ​កម្មសិក្សា​នេះ​ គឺ​ជា​ពេល​វេលា​មួយ​ដ៏​ល្អ​ ដែល​លត់ដំ​ និង​បង្រៀន​ពួក​យើង​ឱ្យ​រឹងមាំ និង​ឯករាជ្យ​៕

អត្ថបទដោយ៖ ​ម៉េង សុខហ៊ួយ និងម៉ៅ ធានី