ដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ នៃសាកលវិទ្យាយល័យភូមិន្ទភ្នំពេញ នៅថ្ងៃនេះ នឹងសម្ពោធកម្មវិធីទូរស័ព្ទនិងគេហទំព័រថ្មីមួយនៃគម្រោង ទីចងចាំ ឬ Mapping Memories Cambodia (MMC) ដែលទាក់ទងនឹងរឿងរ៉ាវនៅសម័យខ្មែរក្រហម តាមរយៈការផ្សារភ្ជាប់ទីតាំងសំខាន់ៗនៅលើផែនទីកម្ពុជា។ ពិធីសម្ពាធនេះ នឹងប្រព្រឹត្តិទៅ នៅល្ងាចថ្ងៃទី០២ ខែកុម្ភៈនេះ វេលាម៉ោង៤:៣០ ល្ងាច នៅបរិវេណដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ នៃសាកលវិទ្យាល័យភូមិន្ទភ្នំពេញ។
កញ្ញា ចាន់ មុយហុង ប្រធានគម្រោងទីចងចាំ ឬ MMC បានឱ្យដឹងថា៖ “កម្មវិធីទូរស័ព្ទ និងគេហទំព័រ ទីចងចាំ ឬ MMC នេះ និយាយអំពីទីតាំងសំខាន់ៗនៃប្រវត្តិសាស្ត្រខ្មែរក្រហម ដោយបង្ហាញទីកន្លែងសំខាន់ៗទាំងនោះនៅលើផែនទីប្រទេសកម្ពុជា។ មកទល់ពេលនេះ យើងបានដៅខេត្តក្រុងក្នុងព្រះរាជាណាចក្រកម្ពុជាបានប្រមាណជា១៨ខេត្តក្រុងហើយ មានដូចជា ទីក្រុងភ្នំពេញ ខេត្តព្រះសីហនុ ខេត្តបាត់ដំបង បន្ទាយមានជ័យ សៀមរាប កំពង់ធំ ជាដើម”។
ប្រធានគម្រោង បានបញ្ជាក់ឱ្យដឹងទៀតថា លក្ខណៈពិសេសលេចធ្លោរបស់កម្មវិធីទូរស័ព្ទ និងគេហទំព័រ ទីចងចាំ ឬ MMCនេះ គឺវាអាចនាំផ្លូវអ្នកប្រើប្រាស់ទៅកាន់ទីកន្លែងប្រវត្តិសាស្ត្រកើតហេតុជាក់ស្ដែង ដើម្បីឲ្យពួកគាត់បានដឹងរឿងរ៉ាវ ក៏ដូចជា សិក្សាស្រាវជ្រាវពីប្រវត្តិសាស្ត្រខ្មែរក្រហម តាមរយៈបច្ចេកវិទ្យាជាពហុប្រព័ន្ធផ្សព្វផ្សាយ មានដូចជា អត្ថបទ, វីដេអូ, សម្លេង, និងកម្រងរូបថតជាដើម។
កម្មវិធីទូរស័ព្ទ និងគេហទំព័រ ទីចងចាំ ឬ MMC មានរឿងរ៉ាវគួរឲ្យចាប់អារម្មណ៍ជាច្រើន ដូចជា ការរៀបការដោយបង្ខំ ជម្លោះដែនទឹក រវាងទ័ពខ្មែរក្រហម និងទ័ពអាមេរិក ការយកប្រាសាទអង្គរវត្ត មកបម្រើគោលនយោបាយការបរទេស របស់របបខ្មែរក្រហមជាដើម។ ស្នាដៃទាំងអស់នេះ បានមកពីការស្រាវជ្រាវផ្ទាល់នៅកន្លែង និងសម្ភាសអ្នកនៅរស់រានមានជីវិតពីរបបខ្មែរក្រហម ដើម្បីផលិត បានជា បទយកការណ៍វិទ្យុ ភាពយន្តឯកសារខ្នាតខ្លី កម្រងរូបភាព និងអត្ថបទយកការណ៍ស្ដីពីរឿងរ៉ាវដែលកើតឡើងក្នុងសម័យខ្មែរក្រហម របស់និស្សិតជំនាន់ទី១៥ និងទី១៦ នៃដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍។
កញ្ញា គួច ម៉ាស៊ី និងផលិតករមួយរូប នៃភាពយន្តឯកសារ “កោះតាង” ដែលនិយាយពីជម្លោះដែនទឹករវាងទ័ពខ្មែរក្រហម និងទ័ពអាមេរិក បានរៀបរាប់ពីការលំបាកនៃផលិតភាពយន្តខ្លីនេះថា៖ “ទម្រាំបានចេញនូវស្នាដៃមួយនេះ ក្រុមរបស់ខ្ញុំ បានជួបការលំបាកជាច្រើនដូចជាកង្វះឯកសារ ប្រភពព័ត៌មានជាដើម។”
ទោះបីជាប្រទះនឹងបញ្ហាប្រឈមជាច្រើន ក៏ប៉ុន្តែ ម៉ាស៊ី បានទទួលស្គាល់ថា គាត់បានរៀនសូត្រពីការងារបានយ៉ាងច្រើនដូចជា ការចេះសាមគ្គី តស៊ូ និងអត់ធ្មត់ ក្នុងធ្វើការជាក្រុម រៀនពីបច្ចេកទេសផលិតរឿងបានល្អ ជាងមុន ហើយអ្វីដែល សំខាន់យល់ដឹងអំពី ប្រវត្តិសាស្ត្រខ្មែរក្រហម។
លោក អ៊ុង ប៊ុនអ៊ី ប្រធានស្ដីទីដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) ក៏ដូចជាអ្នកផ្ដួចផ្ដើមគម្រោង ទីចងចាំ ឬ MMC នេះ ឲ្យដឹងថា៖ “គម្រោងទីចងចាំ ឬ MMC នេះបង្កើតឡើងក្នុងគោលបំណងជំរុញឲ្យយុវជនខ្មែរជំនាន់ក្រោយ ប្រើប្រាស់បច្ចេកវិទ្យានាពេលបច្ចុប្បន្ននេះ ដើម្បីចុះទៅស្រាវជ្រាវបន្តអំពីព័ត៌មានទាក់ទងនឹងរឿងរ៉ាវខ្មែរក្រហម នៅតំបន់ប្រវត្តិសាស្ត្រទាំងនោះព្រមទាំងបង្កើតការសន្ទនាអំពីប្រវត្តិសាស្ត្រខ្មែរក្រហមក្នុងចំណោមយុវជន និងក្រុមគ្រួសារ”។
លោក អ៊ុង ប៊ុនអ៊ី មើលឃើញថា កម្មវិធីទូរស័ព្ទ និងគេហទំព័រនេះ នឹងដើរតួជាវេទិកាដ៏សំខាន់មួយសម្រាប់កិច្ចសន្ទនាប្រកបដោយ អត្ថន័យ និងដោយចំហ អំពីប្រវត្តិសាស្ត្រខ្មែរក្រហមសម្រាប់យុវជនជំនាន់ក្រោយរួមទាំងអ្នករស់រាន ពីរបបខ្មែរក្រហម។
អ្នកអាចចូលទស្សនា ស្ដាប់ និងអាន សាច់រឿងទាំងអស់ជាភាសាខ្មែរ ឬ អង់គ្លេស តាមរយៈគេហទំព័រ http://mappingmemoriescambodia.com ឬកម្មវិធីទូរស័ព្ទទីចងចាំ ឬ Mapping Memories Cambodia (MMC) ដែលនឹងអាចទាញយកបានទាំងនៅលើ App Store និងនៅលើ http://Google Play Store ចាប់ពីពេលនេះតទៅ៕
អត្ថបទដោយ៖ ម៉េង សុខហ៊ួយ
Leave a Reply