សម្រាប់​ខែ​មីនា​នេះ​ អ្នក​អាច​ចូលរួម​កម្មវិធី​សំខាន់ៗ​ ជាច្រើនដូច​ខាងក្រោម​៖

១. ពិព័រណ៍​បច្ចេកវិទ្យា​ថ្នាក់​ជាតិ​

ពិព័រណ៍​បច្ចេកវិទ្យា​ថ្នាក់​ជាតិ​ដំបូង​ និង​ធំ​បំផុត​ ប្រចាំ​ឆ្នាំ​ នឹង​ប្រព្រឹត្តិ​ឡើង​នៅ​ថ្ងៃ​ទី​១៥ ដល់​១៧ ​ខែ​មីនា​ ឆ្នាំ​២០១៩​ នៅ​សាលពិព័រណ៍​កោះពេជ្រ​។ ពិព័រណ៍​នេះ ​មាន​សន្និសីទ​ និង​ការ​តាំង​ពិព័រណ៍​ទាក់ទង​ទៅ​នឹង​បចេ្ចកវិទ្យា​ ក្នុង​គោលបំណង​ជំរុញ​សហគ្រិនភាព​ប្រកប​ដោយ​ចីរភាព​នៅ​កម្ពុជា​ ក៏ដូចជាជួយ​ជំរុញ​នូវ​ការ​បង្កើត​ថ្មី​។ អ្នក​ទាំងអស់​គ្នា​អាច​ចូលរួម​បាន​ដោយ​សេរី​!

ព័ត៌មាន​លម្អិត​៖http://bit.ly/2VE4wpk

២.​ ទិវា​ជាតិ​អំណាន​លើក​ទី​៤​

នេះ​ជា​លើក​ទី​៤ហើយ​ដែល​មាន​កា​ររៀបចំ​ទិវា​អំណាន​ជាតិ​។ ឆ្នាំនេះ​ ទិវា​ជាតិ​អំណាន​ មាន​កម្មវិធី​នានា​ដូចជា​ការ​ចែក​សៀវភៅ​ឥត​គិត​ថ្លៃ​ ការ​តាំង​ពិព័រណ៍​សៀវភៅ​ និង​ កម្មវិធី​កម្សាន្ត​ជាច្រើន​ផ្សេង​ទៀត​ដើម្បី​បង្កើន​ចំណេះដឹង​។ ទិវា​ជាតិ​អំណាន​លើក​ទី​៤​ មាន​រយៈពេល​៣ថ្ងៃ​ គឺ​ពី​ថ្ងៃទី​៩ ដល់​១១​ ខែ​មីនា​ ឆ្នាំ២០១៩​ នៅ​ក្នុង​បរិវេណ​វិទ្យាស្ថាន​បច្ចេក​វិទ្យា​កម្ពុជា​(ITC)។

សម្រាប់​ព័ត៌មាន​បន្ថែម​៖https://www.facebook.com/events/947674172289646/

៣. មហោស្រព​ភាពយន្ត​អន្តរជាតិ​កម្ពុជា​លើក​ទី​៩

មហោស្រព​ភាពយន្ត​អន្តរជាតិ​កម្ពុជា​លើក​ទី​៩ នឹង​ប្រព្រឹត្តិ​ទៅ​ចាប់ពី​ថ្ងៃទី​៩​ ដល់​ថ្ងៃទី​១៤​ ខែមីនា​ ខាង​មុខ​នេះ​ ហើយ​អាច​ចូលរួម​ដោយ​សេរី​។ មហោស្រព​នេះ​មាន​ចាក់បញ្ចាំង​នូវ​ខ្សែ​ភាពយន្ត​ជាង​១៣០​ចំណងជើង​ មកពី​៣៧​ប្រទេស​ នៅ​ទូទាំង​ពិភពលោក​។ ខ្សែ​ភាពយន្ត​ទាំងនោះ​ រួមមាន​ភាពយន្ត​ខ្នាតខ្លី​ ភាពយន្ត​ខ្នាតធំ​ ភាពយន្ត​ឯកសារ​ ព្រមទាំង​គំនូរ​ជីវចល​។ ចំណែក​ ទីតាំង​ចាក់​បញ្ចាំង​គឺ​មាន​នៅ​តាម​រោងភាពយន្ត​ធំៗ​មួយ​ចំនួន​ក្នុង​រាជធានី​ភ្នំពេញ​ ក្នុង​នោះ​រួមមាន​ រោងភាពយន្ត​លេជេន​, រោងភាពយន្ត​ម៉េជ័រស៊ីណេផ្លិច​, រោងភាពយន្ត​ប្រែមស៊ីណេផ្លិច​, មជ្ឈមណ្ឌល​បុប្ផាណា​, សាលមហោស្រព​ចតុម្មុខ​, និង​សណ្ឋាគារ​រ៉ូសវូដ​។

អ្នក​អាច​ទាញ​យក​កម្មវិធី​ទាំងមូល​បាន​តាមរយៈ​តំណភ្ជាប់​៖ https://goo.gl/RkJyBY​

ព័ត៌មាន​បន្ថែម​៖https://www.facebook.com/events/260451784870393/​​​

៤. ការ​សម្ដែង​សម្ពោធរោង​ដោយ​សមាគម​សិល្បករ​គោកធ្លក​

នៅ​ថ្ងៃទី​១០ ខែមីនា​ ខាងមុខ​នេះ​ សមាគម​សិល្បករ​គោកធ្លក​នឹង​សម្ដែង​ល្ខោនស្បែក​តូច​ ស្បែកធំ​
យីកេរ​ដំកង់​ សម្ពោធ​រោង​នៅ​ក្នុង​បរិវេណ​បណ្ណាល័យជាតិ​។ អ្នក​ចូលរួម​អាច​ចូល​ទស្សនា​បាន​ដោយ​ឥតគិតថ្លៃ​ចាប់​ពី​ម៉ោង​ ១៨:៣០ ដល់​ម៉ោង​ ១៩:៣០។ ប៉ុន្តែ​ អ្នក​ដែល​មាន​បំណង​ចូល​ទស្សនា​ ត្រូវ​កក់កន្លែង​ជាមុន​តាមរយៈ​លេខ​ទូរស័ព្ទ​ទំនាក់ទំនង​។

ព័ត៌មាន​លម្អិត​៖https://www.facebook.com/events/593821954377885/​

៥. ពិព័រណ៌​អាហារ​ស្លាបព្រា​

តើ​អ្នក​ធ្លាប់បាន​ភ្លក្ស​ឬ​បរិភោគ​អាហារ​ប្រភេទ​អ្វីខ្លះ​?​ ពិព័រណ៌​អាហារ​ស្លាបព្រា​មាន​ស្ដង់​លក់​អាហារ​ប្រមាណ​១៥០​ ដែល​ក្នុង​នោះ​មាន​ម្ហូប​ខ្មែរ​ អ៊ីតាលី​ បារាំង​ ឥណ្ឌា​ជាដើម​។ លើសពីនេះទៅទៀត​ ក្នុង​ពិរព័រណ៍​នេះ​មាន​ការ​លេង​ល្បែង​កម្សាន្ត​ ការ​ប្រកួត​ញ៉ាំ​អាហារ​ និង​កម្មវិធី​ផ្សេងៗ​ទៀត​ផង​ដែរ​។ អ្នក​ទាំង​អស់​គ្នា​អាច​ចូលរួម​ពិព័រណ៌​អាហារ​ស្លាបព្រា​នេះ​ បាន​ដោយ​សេរី​ នៅ​ថ្ងៃទី​៣០ និង​៣១ ខែ​មីនា​ ឆ្នាំ២០១៩​ នៅ​ពហុកីឡាដ្ឋាន​ជាតិ​អូឡាំពិក​។

ព័ត៌មាន​លម្អិត​៖ https://www.facebook.com/pg/SlapreaKH/​

អត្ថបទដោយ​៖ ទី កញ្ញា