ពិព័រណ៍រូបថត ឆ្លុះបញ្ចាំងទិដ្ឋភាពក្នុងសង្គម បន្តតាំងបង្ហាញ រហូតដល់ពាក់កណ្តាលខែក្រោយ

 

ពិព័រណ៍រូបថត «ពីក្រោយការពិត» រៀបចំឡើងដោយនិស្សិតឆ្នាំទីពីរ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ ដែលទើបដាក់សម្ពោធកាលពីពេលថ្មីៗនេះ នឹងបន្តប្រព្រឹត្តិទៅរហូតដល់ថ្ងៃទី ១៥ ខែកក្កដា ឆ្នាំ២០១៩ នៅក្នុងបរិវេណ​នៃសាកលវិទ្យាល័យភូមិន្ទភ្នំពេញ។

លោកអ្នកអាចចូលរួម ការដាក់តាំងបង្ហាញរូបថតដែលជាស្នាដៃរបស់និស្សិត ចាប់ពីម៉ោង ៨ព្រឹក ដល់ម៉ោង ៥ល្ងាច នៅរៀង​រាល់ថ្ងៃច័ន្ទ ដល់ថ្ងៃសុក្រ ដោយមិនគិតថ្លៃ។

ពិព័រណ៍រូបថត «ពីក្រោយការពិត» ដែលឆ្លុះបញ្ចាំងពីទិដ្ឋភាពនៅក្នុងសង្គមកម្ពុជា បានច្បិចនូវប្រធានបីសំខាន់ៗ។ ទី១៖គ្មានទេផែនដីទី២ បង្ហាញពីបញ្ហាចោលសម្រាមគ្មានសណ្ដាប់ធ្នាប់ ដែលជាហេតុបណ្ដាលឲ្យមានផលប៉ះពាល់ដល់បរិស្ថាន សុខភាព និងសោភ័ណភាព។ ប្រធានបទទីពីរ៖ ដំណក់ញើស ឆ្លុះបញ្ចាំងពីការខិតខំប្រឹងប្រែងក្នុងការហ្វឹកហាត់ របស់សិល្បករ​របាំបុរាណ ដើម្បីក្លាយជាអ្នករបាំដ៏ប៉ិនប្រសប់ម្នាក់។ ប្រធានបទចុងក្រោយ គឺទាក់ទងនឹងការស្រលាញ់មួយ ដែលមិនទាន់​មាន​ការគាំទ្រពីមហាជន គឺអ្នកស្រលាញ់ភេទដូចគ្នា ក្រោមចំណងជើងថា ក្រមប្រតិព័ទ្ធ។

ពិព័រណ៍រូបថតដំបូងបង្អស់នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នេះត្រូវបានផលិត និងរៀបចំ​ដោយក្រុមនិស្សិតឆ្នាំទី២ ជំនាន់ទី១៧ ក្រោយពីសិក្សាផ្នែកថតរូបសារព័ត៌មានជាមួយលោកគ្រូ ផន ភារិទ្ធ អស់​រយៈពេល​មួយឆមាស​កន្លងមក ដោយការស្រាវជ្រាវ និងចុះទៅកាន់ទីតាំងនានា ដើម្បីអនុវត្តជាក់ស្តែងនូវចំណេះដឹង និងបច្ចេកទេសថតរូប ក៏ដូចជាផ្តិតយករូបភាព ដែលឆ្លុះបញ្ចាំងពីទិដ្ឋភាពនៅក្នុងសង្គមកម្ពុជា។

សម្រាប់លោកអ៊ុង ប៊ុនអ៊ី ប្រធានស្ដីទីដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍(DMC) ពិព័រណ៍រូបថតនេះ ក៏រំលេចចំណុចសំខាន់៣ គឺទីមួយ ផ្សារភ្ជាប់ការសិក្សាទ្រឹស្តី នឹងការអនុវត្តផ្ទាល់របស់និស្សិតដើម្បីពង្រឹងចំណេះដឹង ក៏ដូចជាចំណេះធ្វើរបស់ពួកគេ។ ទី២ គឺបង្កលក្ខណៈឲ្យនិស្សិតសិក្សាស្រាវជ្រាវ ឈ្វេងយល់ពីបញ្ហានានា ក៏ដូចជា វឌ្ឍនភាពនៅក្នុងសង្គម ហើយឆ្លុះបញ្ចាំងរឿងរ៉ាវទាំងនោះតាមរយៈអ្វីដែលខ្លួនបានសិក្សារៀនសូត្រ ដើម្បីឲ្យមហាជន បានដឹងឮ។ ទី៣គឺជួយពញ្ញាក់ស្មារតីរបស់មហាជន ឲ្យបង្កើនការចាប់អារម្មណ៍លើបញ្ហាទាំងនោះ និងចង់ឲ្យពួកគាត់ ជាចំណែកមួយនៃដំណោះស្រាយ៕