ដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍ ចាប់ផ្តើមប្រើប្រាស់កម្មវិធី Office 365 សម្រាប់ជាជំនួយដល់ការរៀន និងការបង្រៀន

ភ្នំពេញ៖​ ដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍បានជួយឲ្យ ការសិក្សា និង ការបង្រៀនមានភាពងាយស្រួលជាងមុនដោយការចាប់ផ្តើមប្រើប្រាស់ កម្មវិធី Office 365 ជាលើកដំបូងបង្អស់សម្រាប់ និសិត្ស សាស្រ្តាចារ្យ ក៏ដូចជាបុគ្គលិកផងដែរ។

ដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍បានចាប់ផ្តើមប្រើប្រាស់ Software របស់Microsoft ដែលរួមបញ្ចូល កម្មវិធី និង សេវាកម្មផ្សេងៗ ក្នុងនោះរួមមាន អាជ្ញាប័ណ្ណប្រើប្រាស់ Window 10, Office 356 suite និង កម្មវិធីដែលមានមុខងារខុសៗគ្នាជាច្រើនទៀតកាលពីខែសីហាកន្លងមកនេះ។

លោក អ៊ុង ប៊ុនអុី ប្រធានដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍មានប្រសាសន៍ថា៖​ “Software របស់Microsoft ដែលរួមបញ្ចូល កម្មវិធី និង សេវាកម្មផ្សេងៗនេះ អាចជួយឲ្យការសិក្សា ការបង្រៀន និង ការងារនានានៅក្នុងដេប៉ាតឺម៉ងមានប្រសិទ្ធភាព ភាពងាយស្រួល ក៏ដូចជាមានគុណភាពជាងមុន បើប្រៀបធៀបទៅនឹងកម្មវិធីផ្សេងៗដែលដេប៉ាតឺម៉ងធ្លាប់ ប្រើប្រាស់ពីមុនមក។”

មុនងារសំខាន់មួយនៅក្នុងបញ្ចប់ Microsoft នេះ គឺកម្មវិធី Teams ដែលជាកម្មវិធីដែលជួយសម្រួលការងារនៅក្នុងថ្នាក់រៀន និង ការគ្រប់គ្រងថ្នាក់រៀនទូទៅ។ តាមរយ:កម្មវិធីនេះ គ្រូបង្រៀនអាចបង្តើតជាថ្នាក់រៀនអនឡាញ ដើម្បីបង្ហោះ ឯកសារបង្រៀន ការពិភាក្សានៅក្នុងថ្នាក់រៀន កិច្ចការសម្រាប់និស្សិត ជាដើមបាន។ ទន្ទឹមនឹងនេះ គ្រូក៏អាចផ្តល់មតិវាយតម្លៃចំពោះកិច្ចការសិស្ស និងចែករំលែកព័ត៌មានផ្សេងៗបានផងដែរ។

លោក មួរ ម៉េងសេង អ្នកឯកទេសផ្នែកព័​ត៌​មាន​វិទ្យានៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍បានថ្លែងថា៖​ “កម្មវិធី Microsoft Teams អនុញ្ញាតឲ្យការទំនាក់ទំនង និងការសហការ រវាងគ្រូនឹងសិស្សមានការល្អប្រសើរជាងមុន។ ទាំងគ្រូនិងសិស្ស អាចប្រើប្រាស់កម្មវិធីនេះបានគ្រប់ពេលវេលា គ្រប់ទីកន្លែង លើគ្រប់ឧបករណ៍ទាំងអស់។

លោកប៊ុនអុី បានបន្ថែមថា៖ “ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ គឺជាដេប៉ាតឺម៉ង់ដំបូងក្នុងសាកលវិទ្យាល័យភូមិន្ទភ្នំពេញ ដែលមានអជ្ញាប័ណ្ណពេញលេញក្នុងការប្រើប្រាស់កម្មវិធី Office 365នេះសម្រាប់ជាជំនួយដល់ការរៀន និងការបង្រៀន។”

លោកបានបន្ថែមទៀតថា៖ “កម្មវិធីនេះនឹងជួយធ្វើឲ្យការគ្រប់គ្រងទូទៅនៅក្នុងដេប៉ាតឺម៉ងមានប្រសិទ្ធភាពល្អជាងមុន។ ដេប៉ាតឺម៉ងរបស់យើងអាចផ្ទុកឯកសារនៅក្នុង Cloud បានសម្រាប់ការប្រើប្រាស់នៅពេលអនាគត ដែលជាផ្នែកមួយនៃការគ្រប់គ្រងចំណេះដឹង  (Knowledge Management System)។”

លោក មួរ ម៉េងសេង បានថ្លែងបន្ថែមថា៖ “កម្មវិធីនៅក្នុង Office 365 នេះអាចជួយសន្សំពេលវេលា និង ថវិការបានផងដែរ។ ដោយសារកម្មវិធីនេះនឹងជួយកាត់បន្ថយការប្រើប្រាស់ក្រដាស និង ពេលវេលាដែលចំណាយទៅលើ ការព្រីន និងការថតចម្លងឯកសារផ្សេងៗនៅក្នុងថ្នាក់ដូចជា មេរៀន និងកិច្ចការសាលាដែលយើងធ្លាប់តែធ្វើកន្លងមក។”

ប៉ុន្តែ មិនមែននិសិស្សទាំងអស់សុទ្ធតែចេះប្រើប្រាស់កម្មវិធីថ្មីនេះក្នុងរយ:ពេលខ្លីនោះទេ។ និសិស្សខ្លះនិយាយថា កម្មវិធីនេះលំបាកក្នុងការប្រើប្រាស់ និង ការចូលមើល។ ដោយហេតុថា ពួកគាត់ទម្លាប់ប្រើប្រាស់កម្មវិធីផ្សេង ដូចជា WhatsApp និង Telegram។

នូ វិរ: និសិត្សឆ្នាំទី២ នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ បានប្រាប់ថា៖​ “កម្មវិធីរបស់ Microsoft មួយនេះ គឺថ្មី ហើយដំបូងៗ វាពិបាកប្រើ។ យើងត្រូវចំណាយពេលខ្លះដើម្បីទម្លាប់។”

វិរ: បាននិយាយទៀតថា៖ “កម្មវិធីនេះពិតជាល្អណាស់សម្រាប់ការទាក់ទងរវាងគ្រូនិងសិស្ស។ ការប្រើប្រាស់កម្មវិធី Teams  ពិតជាមានអត្ថប្រយោជន៍ណាស់សម្រាប់បរិស្ថាន ដោយសារវាអាចជួយកាត់បន្ថយការប្រើប្រាស់ ក្រដាស និង ទឹកថ្នាំ។”

រ៉ូ គឹមឡុង  និសិត្សឆ្នាំទី២ នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ បាននិយាយថា៖ “វាជារឿងល្អ។ ដោយសារវាជាប្រព័ន្ធឯកជន ដែលអនុញ្ញាតឲ្យយើងធ្វើការទាក់ទងជាមួយមនុស្សគ្រប់រូបនៅក្នុងដេប៉ាតឺម៉ង់ មិនថា បុគ្គលិក និសិត្សដូចគ្នា និងគ្រូនោះទេ។”

គឹមឡុង បន្តទៀតថា៖ “ក៏ប៉ុន្តែ ដេប៉ាតឺម៉ង់អាចសន្សំថវិការដោយការប្រើប្រាស់កម្មវិធី Google Classroom ដែលជាកម្មវិធីមានមុខងារប្រដៀងគ្នានឹង Teams ជំនួសវិញក៏បានដែរ។”

លោកប៊ុនអុី ថ្លែងថា៖ “រវាងកម្មវិធីទាំងពីរនេះ Office 365 ផ្តល់ជូនឧបករណ៍ប្រើប្រាស់ល្អជាង និងទូលំទូលាយជាង Google Classroom។”

រាយការណ៍ព័ត៌មាននិងសរសេរដោយ៖ សរ ហេរ៉ូ